Прво место во категоријата Основни вредности и Најдобар ментор, како и трета награда за Игра со роботи освоија учениците од основните и средни училишта од Кочани, кои го сочинуваа тимот од Македонија на регионалниот натпревар по роботика што се одржа во Гросупље, Словенија.
Тие беа единствени претставници од Македонија во Адриа лигата, а со постигнатиот успех се стекнуваат со право да учествуваат на Европското првенство по роботика што ќе се одржи во Унгарија.
– Очекуваме до 20. март да не известат дали ќе учествуваме на првенството бидејќи Македонија се уште нема формирано своја лига, а со тоа немаме ни лиценца за натпреварување на Европско првенство. Претходно бевме принудени да се натпреваруваме во лигата на Србија, каде во конкуренција на 20 екипи го освоивме првото место и се стекнавме со право да патуваме во Словенија, рече Гордан Анастасов, професор во СОУ „Гошо Викентиев“ од Кочани, кој ја освои наградата за најдобар ментор.