Генералниот секретар на Светската туристичка организација, Талеб Рифаи, во рамки на официјалната посета на Македонија, денеска престојуваше во Охрид каде оствари средба со претставници од локалната самоуправа, предводени од заменик-градоначалникот Ангел Јанев.
– Во светот нема многу места каде што на ваков уникатен начин како во Охрид се испреплетени природната убавина, културно-историското богатство, убавината на планините и езерото. Ова место заслужува да биде познато за остатокот од светот, изјави Рифаи, најавувајќи дека во рамки на Светската туристичка организација ќе иницира низа мерки за промоција на Охрид.
Тој укажа на потребата од одредени интервенции во делот на подобрување на инфраструктурата, но сепак со уверување дека Охрид заслужува место меѓу најпознатите туристички дестинации од светски ранг.
Заменик-градоначалникот Јанев по средбата брифираше дека на состанокот било разговарано за активностите што ги спроведува Охрид за промоција на туризмот. Акцент бил ставен на замислата за поврзување на Дубровник и Охрид, односно туристите кои престојуваат во Дубровник на неколку дена да доаѓаат овде, идеја што наишла на поддршка кај првиот човек на Светската туристичка организација.
Била разгледувана и можноста токму во Охрид во догледно време да се одржи голем конгрес на туристички работници од светски ранг, собир во организација на Светската туристичка организација.