Со манифестацијата „Прв до врв“ денеска Скопјани ќе го одбележат вториот роденден на Жичницата на Водно.
Качувањето на Водно ќе почне во 9 часот пред ОУ „Кочо Рацин“ а велосипедската трка на „Солидарност “ во чест на 50 години од скопскиот земјотрес ќе стартува во 10 часот. Вечерта од 22 часот ќе се одржи голема ноќна забава со диџеи од македонската сцена.
Натпреварувачите ќе добијат сертификат за учество, а најдобрите ќе бидат наградени со пехари и парични награди. Имињата на најбрзите учесници во трките ќе бидат испишани на трајна табла која ќе биде поставена на врвот на Водно.
На доделувањето на наградите на Средно Водно ќе присуствува градоначалникот на Град Скопје, Коце Трајановски.
Манифестацијата ја организираат Градот Скопје и Јавното сообраќајно претпријатие (ЈСП).