Во кругот на Кочанската територијална противпожарна единица денеска беше извршено примопредавањето на товарно противпожарно возило марка „Там“ на општина Чешиново Облешево, како донација од општина Кочани за трајно користење и управување. Станува збор за товарно противпожарно возило во кое можат да се сместат осум лица, а ќе го користи Комуналното јавно претпријатие „Облешево“.
На примопредавањето присуствуваа градоначалникот на Кочани Ратко Димитровски и градоначалникот на Чешиново Облешево Костадин Личков.
– Возилото го отстапуваме на трајно користење без надомест со одлука на Советот на општина Кочани. Со ова им излегуваме во пресрет на граѓаните од соседната општина да може возилото да се користи во итни случаи на гаснење пожар додека да интервенира територијалната противпожарна единица од Кочани, изјави градоначалникот Ратко Димитровски.
За градоначалникот на општина Чешиново Облешево возилото е добредојдено за интервенирање во итни случаеви кога има запалени стрништа и нискостеблеста шума во атарот на општината.
– Возилото ке го користи нашето Комунално претпријатие и тоа ќе биде дел од возниот парк со кој располага истото, истакна Личков.
Според командирот на кочанската територијална противпожарна единица Дејанчо Арсов, на територијата на општина Чешиново Обелшево минатата година во екот на пролетта и во летниот период се случиле над триесетина пожари на кои тие биле подготвени да делуваат и истите да ги стават во мирување.
Со ова возило, истакнува Арсов ќе се делува превентивно додека пристигне нашата територијална противпожарна единица.
Инаку, територијалната противпожарна единица на Кочани делува на подрачјето од општните Кочани, Чешиново Облешево и Зрновци, а во итни случаи интервенира и во соседните општини кога се бара од нив помош.