Фасадирање на старите оштетени згради во општина Аеродром, почнувајќи од зградите на главните булевари и изградба локален пат во селата Долно и Горно Лисиче се дел од приоритетите на кандидатот за градоначалник на СДУ од Општина Аеродром, Маја Миловановиќ-Михајловиќ.
На отворањето на партискиот изборен штаб во општина Аеродром Миловановиќ-Михајловиќ рече дека ќе работи на згрижување на кучињата скитници, бесплатен паркинг на целата територија на општината, бесплатни градинки и новогодишни пакетчиња за сите деца во градинките.
– Ќе се залагаме за развој, напредок, јакнење на општината, преку моќта на знаењето, конструктивна работа, оригинални и остварливи активности и идеи, колективен успех преку тесна соработка со граѓаните од урбаната и руралната средина, невладиниот сектор, академската заедница и стопанствениците, дирекна врска и соработка со сите институции на системот, рече Миловановиќ-Михајловиќ.