Во организација на Општина Штип и Словенечко-македонскиот бизнис клуб во хотелот Оаза во Штип денес се одржа промотивен словенечко-македонски бизнис ден на кој присуствуваа амбасадорот на Република Словенија, Бранко Раковец, градоначалникот на општина Штип, Илчо Захариев и претставници на бизнис-клубот.
„Штип има голем индустриски потенцијал, а токму ваквиот потенцијал беше причината поради која бизнис-клубот решивме денес да ја организира ваквата средба преку која се отвораат нови можности за потенцијална соработка меѓу македонските и словенечките компании“,изјави директорот на Словенечко-македонскиот бизнис клуб, Дамир Кудри.
Амбасадорот на Република Словенија, Бранко Раковец, истакна дека приоритет на словенечката амбасада во Македонија е негувањето добрата бизнис- соработка меѓу двете земји поради што вратите на амбасадата се секогаш отворени за словенечките и за македонските компании.
Според градоначалникот на општина Штип, Илчо Захариев, Штип како град нуди поволна бизнис-клима поради што се надева дека бројот на словенечки компании што сакаат да инвестираат во Штип во иднина ќе биде сè поголем.
Пред стартот на официјалниот дел на средбата словенечките и македонските компании што се членки на Словенечко-македонскиот бизнис клубот имаа можност преку промотивни штандови на штипјани да им ги претстават производите и услугите што ги нудат на пазарот.
М.Р.