Академијата за судии и јавни обвинители и Министерството за правда на Република Македонија денеска ќе ја промовираат публикацијата „Збирка на пресуди на Европскиот суд за човекови права, по членот 10 – слобода на изразување“.
На промоцијата ќе се обратат министерот за правда Блерим Беџети, директорот на Бирото за застапување на Република Македонија пред Европскиот суд за човекови права Костадин Богданов и директорката на Академијата за судии и јавни обвинители, Анета Арнаудовска.
Во два тома од Збирката се содржани преводи на значајни пресуди и одлуки на Европскиот суд за човекови права против други држави во однос на член 10 слобода на изразување од Европската конвенција за човекови права, а воедно се содржани и две одлуки против Република Македонија.
Правото на слобода на изразување е фундаментална основа на демократијата и право кое покрај другите меѓународни документи кои се ратификувани од страна на Република Македонија се гарантира и со членот 10 од Европската конвенција за човековите права.
Членот 10 од ЕКЧП, а посебно судската пракса на Европскиот суд за човекови права се исклучително важни за државите-потписнички на Конвенцијата и тоа не само заради владеењето на правото, туку и заради вградување на стандардите и принципите во законите и во праксата на домашните судови.