Професорите одбија да учествуваат на дебатата во Александар Палас, со образложение дека нема да даваат легитимитет на недемократска и нетранспарентна процедура за измена на законот за образование.
Тие со писмо го известија ректорот на УКИМ дека се заблагодаруваат на поканата упатена до нив, но напоменуваат дека нивниот став е да се повлече законот, а потоа да се отвори широка дебата за законот за високо образование.
Следува интергален тескт од писмото на професорскиот пленум.
Заблагодарјувајќи се на довербата која ја укажавте на неколку претставници на Професорскиот пленум, должни сме да Ве известиме за заклучоците на вечерашната четиричасовна дебата. Во дискусија која ги опфати сите аспекти на утрешниот настан, беше заземен став дека наши претставници не треба да присуствуваат на утрешната конференција, и тоа од неколку причини:
Прво, дебатата е организирана од Владата на Република Македонија во крајно невообичаен формат и за време на викенд. Формална покана се` уште не е доставена, освен што за конференцијата знаеме поради дојава преку медиуми и од Вашиот директен контакт со некои колеги. Ниту има дневен ред, ниту информација за времетраење, список на гости и покриеност со медиуми.
Второ, со нашите колеги-професори не можеме да се гледаме како со ривали, бидејќи веруваме дека и едните и другите се залагаат за иста цел – поквалитетно високо образование. Во академската заедница е најприродно да постојат различни становишта, но не можеме да се конфронтираме и да претставуваме „два табора“ на конференција која ниту е работна група,
ниту е академска расправа. Без оглед какви се ставовите на колегите кои деновиве се потпишуваат во вид на граѓанска иницијатива за „За поддршка на знаењето во високото образование“, ние ги почитуваме. Со нив можеме да спориме на универзитетот, како територија која е независна и автономна од политиката, и за тоа сме подготвени во секое време, за што можеме да се договориме во рамки на универзитетите.
Трето, потсетуваме дека нашите институции, факултетите и универзитетите, одамна излегоа со унисон став во насока на барање законите да се повлечат и да се организира подолга јавна расправа за донесување нов закон за високо образование. Ние како поединци не можеме за времетраење на една ваква дебата да ги соопштиме подобро сите аргументи, кои вие веќе ги доставивте до Владата, а кои се резултат на колективна работа на нашите легитимни тела.
Четврто, по сета медиумска хајка која деновиве се водеше и се уште се води против нас, одбиваме да ја претставуваме страната која наводно се плаши од високи критериуми или ги хушка студентите на протести.
Петто, самата дебата во хотел па дури и ако е организирана од Владата нема никаква смисла. Законот се наоѓа во Собранието, а оваа дебата е средство преку кое Владата сака да легитимира – и тоа со наше соучество – една недемократска и нетранспаретна процедура.
Конечно, со полна доверба во Вас, оставаме да ги пренесете заклучоците на ректорската управа и сенатот на УКИМ, зад кои и ние се уште стоиме цврсто.
Свесни сме дека се ова тешки времиња и за Вас, но ова се денови на искушение и за нашите студенти и за мнозина од нас.
Со почит,
Професорски пленум