Зголемување на пристапот на жените од немнозинските етнички заедници на пазарот на трудот, преку зајакнување на нивните капацитети, има за цел проектот „Вклучување на жени од етнички заедници на пазарот на трудот“.
Проектот ќе трае 18 месеци и е финансиран од Европската Унија преку буџетската линија ИПА за развој на човечки ресурси со 210.000 евра. Тој е имплементиран од CARE Германија/Луксембург e.V. и Женската граѓанска иницијатива АНТИКО.
Во рамки на проектот ќе бидат спроведени обуки за 250 жени од Скопје, Куманово, Штип, Битола и Тетово, за нивна професионална ориентација и зголемување на нивното знаење и капацитети, со цел тие да станат поконкурентни на пазарот на трудот. За 30. најуспешни проектот ќе понуди професионална пракса во соработка со локалните работодавачи.
Проектот е наменет за жени на возраст од 20 до 40 години со минимум завршено основно образование, а предвидува и спроведување креативни работилници за згрижување на децата, додека нивните мајки учествуваат на обуките.