Со европски пари општина Крива Паланка и косовската општина Витина ќе градат пешачки патеки и ќе ги развиваат туризмот и меѓусебната соработка. Активностите се предвидени со проект насловен „Туризам без граници“, што ќе се имплементира во наредните 18 месеци во рамки на ИПА програмата на Европската унија, за прекугранична соработка помеѓу Република Македонија и Косово.
– Станува збор за проект кој спаѓа во групата на инвестициски проекти и предвидува изградба на пешачки патеки во двете општини, како и низа неинвестициски активности кои треба да придонесат за унапредување на туризамот и туристичката понуда во двете општини, да дадат придонес за интензивирање и продлабочување на соработката како на локално ниво така и помеѓу двете соседни држави, и градење заедничка европска иднина, што всушност претставува и основна цел на ИПА програмата на Европската унија, информира градоначалникот на Крива Паланка, Борјанчо Мицевски.