Собранието на Република Македонија денеска во рамки на 80-та седница ќе ја продолжи расправата за реализација на проектот за топлификација на Битола.
Предлог законот за гаранција на Република Македонија на обврските по Договорот за заем за финансирање на проектот Топлификација на Битола, кој ќе се склучи меѓу Кредитната банка за обнова – КфВ и АД ЕЛЕМ, по скратена постапка, вчера пред пратениците го образложи вицепремиерот и министер за финансии Зоран Ставрески.
Министерот посочи дека се работи за значаен проект за граѓаните на општина Битола со кој ќе се реши топлификацијата и ќе се замени употребата на нафтата и дрвото за греење со што ќе се намалат емисиите на стаклени гасови и ќе се подобри сигурноста на дистрибутивната мрежа.
Со законот се предвидува во првата фаза да се изгради систем за производство на топлинска енергија, транспортен довод, примарна пумпно-топлинска станица во Битола, дистрибуциона мрежа во Битола и топлински подстаници, а со втората фаза треба да се изгради дистрибутивната мрежа за населбите Новаци, Могила и Логоварди. За реализација на првата фаза ќе бидат инвестирани 39 милиони евра кои Владата на СР Германија ги обезбеди преку КфВ банката и околу седум ипол милиони евра од АД ЕЛЕМ. Рокот на отплата ќе биде 15 години со грејс период од четири години.
Проектот ќе биде поддржан, според најавите, и од пратениците од опозицијата, но тие забележуваат зошто тој ќе се реализира со заем.
На дневен ред на седницата се и предлог законите за изменување и дополнување на законите за данокот на додадена вредност, за надворешни работи, за Академијата за судии и јавни обвинители, за платите на судиите, за платите на јавните обвинители, по скратена постапка, Предлог законот за основање Универзитет „Мајка Тереза“ во Скопје, по скратена постапка…