Во Собранието на Република Македонија денеска седници ќе одржат комисиите за надворешна политика, финансирање и буџет, труд и социјална политика, одбрана и безбедност, Комисијата за европски прашања и Националниот совет за евроинтеграција.
На дневен ред на Комисијата за надворешна политика се предлог ратификациите меѓу Република Македонија со Руската Федерација и со Сојузна Република Германија, а Комисијата за финансирање и буџет ќе расправа за измените и допонувањата на Законот за данокот на додадена вредност по што ќе ја продолжи расправата по Предлог-буџетот за 2013 година.
Комисијата за труд и социјална политика треба да ја продолжи расправата по Предлог законот за посебните права на припадниците на безбедносните сили и на членовите на нивните семејства, додека Комисијата за одбрана и безбедност ќе ги разгледа предлог измените на Законот за азил и привремена заштита и Предлог законот за приватно обезбедување, двата во прво читање.
Националниот совет за евроинтеграција и Комисијата за европски прашања ќе расправаат по Информацијата за статусот на реализација на Инструментот за претпристапна помош (ИПА) од страна на Република Македонија.
