Собранието на Република Македонија денеска ја продолжи расправата по предлогот за огласување именување јавен обвинител на Република Македонија, што е на дневен ред на 12. седница.
Пратениците од опозицијата повторно предложија да се одложи оваа точка по локалните избори и да се испочитува мислењето на Државната комисија за спречување на корупцијата според кое сите постапки за разрешување и именување носители на јавни функции се ставаат во мирување до завршување на изборите.
– Целата постапка е незаконска. Согласно Изборниот законик, до завршување на изборите не смее да се разрешува и да се вработува. Парламентарното мнозинство не го почитува мислењето на Државната комисија за спречување на корупцијата, што претставува директно кршење на законот, рече Емилија Александрова од ВМРО-ДПМНЕ.
Ставот на владејачкото мнозинство предводено од СДСМ, е дека не е прекршен ниту еден закон во постапка за разрешување на јавниот обвинител Марко Зврлевски. Ги потсетија колегите од опозицијата дека во 2013 година кога биле распишани избори на 11 јануари, веќе на 21 јануари, односно за десет дена, тогашната влада на ВМРО-ДПМНЕ го именувала Зврлевски за јавен обвинител и прашаа зошто тогаш не е реагирано за ова.
Марко Зврлевски беше разрешен од функцијата на 17 август на предлог на Владата бидејќи, како што објаснија, тој ненавремено, незаконито и недоволно стручно ја извршувал функцијата. За в.д. јавна обвинителка е избрана Лилјана Спасовска.
На 12. седница се ставени и неколку закони по скратена постапка, како и Предлог одлуката за утврдување на бројот на потпретседатели на Собранието.
Владејачкото мнозинство го поддржа предлогот на опозицијата на дневен ред, по скратена постапка да бидат ставени три нивни закони.
По скратена постапка ќе се носи пакет закони предложен од владејачкото мнзоинство. Овие три закони предвидуваат минималната плата да биде 12.000, надоместок за одредена група стечајци и укинување на радиодифузната такса, предложени од владејачкото мнозинство.
Владата предложи по скратена постапка да се носат и измените на Законот за медицинските студии и континуираното стручно усовршување на докторите на медицина со којшто, како што меѓу другото кажа министерот за здравство Арбен Таравари, предвидува болниците да одлучуваат кој доктор ќе оди на доусовршување во странство, а не како досега министерот за здравство.
Претседателот на Собранието на РМ Талат Џафери поради протоколарни обврски даде пауза, а расправата по предлогот за огласување именување јавен обвинител на Република Македонија како што рече ќе продолжи попладнево по 15 часот.