Приврзаници на ВМРО-ДПМНЕ ја блокираа крстосницата кај „Мавровка“. Во моментов среде крстосницата се паркирани дваесетина возила.
ВМРО-ДПМНЕ најави блокада на четири крстосници во Скопје во периодот од 15 до 17 часот, а за во 18 часот најави протест пред Министерството за правда. Блокирани се и крстосницата кај Порта Влае; крстосницата помеѓу булеварите Јане Сандански и Србија во населбата Ново Лисиче и крстосницата кај „Рампа“ во населбата Кисела Вода.
Ваквиот потег на партијата следува по притворањето на членови и функционери од ВМРО-ДПМНЕ.
„На удар е слободномислечкиот Македонец, СДС се пресметува со сите оние кои се грижат и на кои Македонија им е значајна. Во 21 век имаме брутален политички прогон. Македонија е единственото место во светот каде што оперски пејач, режисер, актер, архитект, доктор и други десетици патриоти треба да одговараат за измислено дело тероризам. Целата оваа хајка е обид да се замолкне опозицијата и да се скрши отпорот против сите антидржавни политики кои власта ги реализираше во изминатиов период“, велат од ВМРО-ДПМНЕ.