Полициски екипи вчеравечер во два одделни случаи привеле тројца возачи што превезувале поголема група илегални мигранти, соопшти МВР.
Како што информираат оттаму, синоќа, околу 23.30 часот, на автопатот Демир Капија – Неготино, полициски службеници забележале две паркирани возила, автомобил „форд фиеста“ и товарно возило „фиат дукато“, во кое се качувала поголема група мигранти. Кога ги виделе полицајците како даваат знак да застанат, возачот на автомобилот и дел од мигрантите побегнале, а на местото останал возачот на товарното возило, Н.Ц. (31) од Скопје, и деветмина мигранти.
Петнаесетина минути подоцна, на клучката кај Неготино, друга полициска екипа го запрела автомобилот „форд фиеста“ и го привела возачот Д.Н. (33) од Демир Капија. Возачите и мигрантите се приведени во полициската станица Неготино за понатамошна постапка.
Околу 22 часот, пак, на патото Богданци – Струмица, во близина на селото Костурино, полицијата го привела радовишанецот Ж.К. (41), откако во автомобилот „сеат толедо“, сопственост на фирма од Радовиш, биле откриени шестмина мигранти, сириски државјани, информираат од МВР.
