Троца албански државјани кои нелегално влегле во Македонија биле откриени и приведени од полицијата во текот на вчерашниот ден и изминатата ноќ, информираше портпаролот на СВР Тетово Марјан Јосифовски.
Двајца од илегалците И.З. (19) и И.М. (23) биле откриени вчеравечер околу 20 часот и 30 минути во месноста „Цигански гробишта“ во атарот на тетовското село Јажинце. Тие биле забележани, а потоа приведени од службеници на Полициската станица за граничен надзор Рогачевово при обид илегално да влезат во нашата земја од територијата на Косово.
– Албанските државјани, од кои едниот имал, а вториот немал никакви документи, се задржани во Полициската станица Тетово и денеска се предадени за натамошна постапка во Отсекот за прекуграничен криминал, миграции, странци и реадмисија, изјави Јосифовски.
Третиот албански државјанин Ф.Ѓ ( 21 ) од Кукс, кој непријавено престојувал на подрачјето, бил фатен ноќеска половина час по полноќ во близина на бачило во атарот на Селце-Кеч. Јосифовски рече дека и тој е задржан и предаден за натамошна постапка, по што тројцата ќе се соочат со законски предвидените санкции за нелегален влез и непријавен престој, а ќе бидат и депортирани во нивната матична земја.