По претходно добиено оперативно сознание дека е можен сторител на повеќе тешки кражби, од страна на СВР Скопје е пронајден и приведен Е.С.(23) од Скопје.
Од досега преземените мерки и извршениот разговор со него е констатирано дека Е.С. од септември минатата година досега сторил дваесет тешки кражби во куќи, лоцирани во Шуто Оризари и селата Бардовци и Визбегово.
Тешките кражби ги вршел на тој начин што со помош на тврд погоден предмет ги отворал прозорците и влезните врати од куќите и потоа крадел техничка роба (телевизори, лап-топи, дигитални апарати, мобилни телефони, музички системи и др. ), кои потоа ги продавал на лица од Шуто Оризари и од село Визбегово за многу пониска цена од куповната, а парите ги употребил за набавка на наркотични средства.
Врз основа на судска наредба при извршен претрес во куќа во Шуто Оризари, се пронајдени дел од украдените предмети, а во тек се мерки и активности за пронаоѓање и на останатите предмети кои потекнуваат од тешки кражби во куќи. Постојат сознанија дека Е.С. е можен сторител и на други вакви дела, и затоа во тек се активности за нивно расчистување и документирање по што против него ќе биде поднесена соодветна кривична пријава.
Бидејќи Е.С. има пресуда за издржување казна затвор од една година за претходно извршени кривични дела тешки кражби, е спроведен во КПУ Затвор – Скопје.