Охридската полиција поднесе кривични пријави против две лица од Охрид, поради насилно однесување, за што од истражен судија од Основниот суд во Охрид им одреди и мерка притвор во времетраење од 30 дена.
Станува збор за лицата Љ.С.(38) и Ј.Ѓ.(28), двајцата од Охрид, инаку сторители на казнени дела за што биле и затворски осудувани.
Во конкретниот случај пријавените пред два дена околу 20:30 часот во продавница во селото Куратица го искршиле инвентарот и прозорските стакла, а потоа и стаклените шишиња со алкохолни и безалкохолни пијалоци. Тие на вработените и другите присутни во продавницата им упатиле закани по животот.
Двајцата приведени претходно пиеле вино во продавницата и во алкохолизирана состојба побарале од соствениците да играат билијард, при што биле одбиени. Револтирани започнале насилнички и агресивно да се однесуваат и на висок тон да ги навредуваат вработените и гостите. За кратко време ги искршиле масите и столиците, стаклените шишиња и стаклата на прозорците.