Единаесет членови на криминална група кои што разработиле шема за шверц на мигранти од Грција, преку земјава, кон Србија, завршија во притвор. Стануба збор за истрага која започнала уште во мај минатата година, а финализираше деновиве со масовни претреси и апсења, од МВР додаваат дека во групата бил вклучен и полициски службеник. Вчера, полицијата по спроведената полициска операција против криминалната група која криумчарела мигранти, покрај притворот за 11-те членови на групата, поднесе и кривични пријави против 21 лице.
„Од страна на Националната единица за сузбивање на криумчарење мигранти и трговија со луѓе, во Сектор за криминалистички истраги, при Одделот за сузбивање на организиран и сериозен криминал, во содејство со Одделот за специјални и посебни операции и Регионалните центри за гранични работи „Исток“ и „Југ“, во координација со ОЈО за ГОКК, полицијата спровела координирана полициска операција со цел расчистување на кривични дела кои се однесуваат на организирање на група за вршење на кривични дела криумчарење мигранти кои преку грчко-македонската граница, остваруваат нелегален влез на територија низ Република Северна Македонија, по што од членовите на криминалната група се прифаќаат и превезуваат до Кумановско-липковскиот регион“,се наведува во соопштението на МВР.
Оттаму додаваат дека криминалистичката истрага над организираната 20-члена група со дефинирана структура и строга хиерархиска поставеност се спроведувала повеќе месеци, односно од мај минатата година.
Спроед информациите на МВР истрага се водела и против еден полициски службеник кој ја помагал криминалната активност на групата.
„До ОЈО за ГОКК, поднесени се кривични пријави против вкупно 21 лице, и тоа, 32-годишниот Ќ.Н., Ќ.М. на возраст од 29 години, И.А.-38 години, С.М.-31 година, А.А.-33 години, Е.Г.- 31 година , М.И. – 47 години, У.М. 33 години, Ш.Е. 26 години, 27-годишниот М.М., Ј.Д. 42 години, Е.С. 30 години, M.E. 23 години, Е.О. исто така 23 години, 28-годишниот Е.Н. , А.М. на возраст од 29 години, Џ.Б. 23 години, И.Р. 27 години, Љ.М. 42 години, Х.А. 48 години и Љ.Т. на возраст од 58 години, поради основано сомнение за сторени кривични дела „организирање на група и поттикнување на извршување на делата трговија со луѓе, трговија со дете и криумчарење на мигранти“ по член 418-в, „криумчарење на мигранти“ по член 418-б од КЗ на Р.Македонија и за „помагање“ во врска со истото кривично дело“, се наведува во соопштението на полицијата.
Од МВР велат дека Ќ.Н., Ќ.М. и И.А. заедно со организаторите задолжени за прифаќање и превезување на илегалните мигранти С.М. и А.А., со умисла и од користољубие, а со цел стекнување на противправна имотна и материјална корист, организирале криминална група во Република Северна Македонија, која од средината на 2018 година досега, организирале криумчарење на лица илегални мигранти кои на територијата на Република Северна Македонија биле пренесувани илегално од Грција преку т.н. „зелена граница“ во околината на Дојран и Гевгелија. Оттаму со помош на водичи мигрантите биле носени на претходно договорени локации, од каде се вршело нивно прифаќање од страна на лицата членови на групата со товарни и со патнички моторни возила. Илегалните мигранти биле превезувани до Кумановско-липковскиот регион, односно во селата Ваксинце и Лојане, каде биле времено сместувани и засолнувани во објекти на соработниците на криминалната група, а потоа криумчарени преку македонско-српската граница. Најголем број од лицата илегални мигранти кои биле криумчарени од страна на групата биле по потекло од Aвганистан, Пакистан, Ирак, Бангладеш и други земји од Блискиот и Далечниот Исток, кои претходно престојувале на територијата на Грција, велат од полицијата.
Организираната криминална група, при реализирање на криумчарењето на илегалните мигранти, користела и повеќе други лица во својство на помагачи и соработници на криминалната група. С.М. остварувал контакти и средби со полициски службеник, со цел добивање на известувања за поставеноста на полициски патроли, контроли или заседи, како и информации за тоа дали криминалната група е предмет на истрага во МВР и насоки како да го прикријат нивното криминално делување.
Извршени се претреси во 20 објекти во Скопје, Штип, Радовиш и Струмица, по што лишени од слобода беа вкупно 16 лица, а еден е на издржување на казна затвор за сторено кривично дело по член 418-д.
При претресите пронајдени и привремено одземени се 12 патнички моторни возила, 46 мобилни телефонски апарати, 36 сим картички, 17 држачи за сим картички, бела прашкаста материја, марихуана, пиштол кал.9 мм, воздушна пушка кал.4,5 мм ЦЗ, 112 куршуми, 5770 евра, 197.000 денари, 105 американски долари, 100 швајцарски франци во различни апоени, нотеси со телефони и податоци за лица, документи за патување во Грција и други документи.
Пријавените се изведени пред судија на претходна постапка, од чија страна е одредена мерка притвор на 11 од кривичнопријавените лица и тоа на Ќ.Н., Ќ.М., И.А., Е.Г., Х.А., Е.Н., Љ.М., А.М., Ш.Е.,М.Е. и Е.О.. На останатите им е одредена мерка на претпазливост.