Припадниците на АРМ кои учествуваа во мисијата „Брз Лав-14“, како дел од четата за заштита на силите од борбената група на Европската унија (ЕУБГ 2014-2) во Кралството Белгија, денеска се вратија во Република Македонија со највисоки оценки.
На вежбата, соопшти Министерството за одбрана, припадниците на АРМ учествуваа во оценувањето на штабот на ЕУБГ 2014-2 со фиктивни сценарија за хуманитарна мисија за поддршка на раселени лица и бегалци, како и за пребарување и затворање на лица осомничени за воени злосторства.
Предизвик на вежбата претставуваше заедничката работа на 6 различни земји (Република Македонија, Кралството Холандија, Луксембург, Кралството Шпанија, СР Германија и лидерот Кралството Белгија) со персонал од околу 2.500 војници во една борбена група. На оваа вежба АРМ уште еднаш ја покажа својата обученост и интероперативност, стои во соопштението.