Армијата на Република Македонија со свои припадници традиционално учествуваше на десеттиот меѓународен турнир во стрелаштво „Гран При Скопје- 2016“ што се одржа денеска на стрелиштето „Камник“ во Скопје.
Турнирот кој е меѓу поголемите годишни натпревари во стрелаштво во Европа, е во организација на Македонската меѓународна стрелачка федерација (МССФ), а на него АРМ покрај учество во натпреварувањето со свои припадници придонесува и во уредувањето и обезбедување на стрелиштата на кои се вршат натпреварувањата.
Началникот на Генералштабот на Армијата на Република Македонија, генерал потполковник Методија Величковски отворајќи го турнирот, во своето обраќање го потенцира значењето на овој вид спорт особено за воената професија, притоа на натпреварувачите им посака постигнување на врвни резултати.
На натпреварот учествуваа стотина натпреварувачи од Македонија и неколку странски држави во дисциплините: пиштол на 25 метри, пушка на 100 метри, снајперска тактичка полуавтоматска пушка и снајперска ловечка пушка на 100 метри.
Во натпреварувањата припадниците од командите и единиците на АРМ кои екипно беа меѓу најбројните натпреварувачи, постигнаа високи резултати во поединечна и екипна конкуренција во сите застапени дисциплини, соопшти прес-службата на АРМ.