По повод примопредавањето на должноста, денеска беше остварена средба помеѓу новата директорка на Управата за јавни приходи Сања Лукаревска и досегашната Анастасија Илиеска.
На средбата, како што соопшти УЈП, се разговарало за тековните проблеми, предизвиците на даночната администрација, модернизацијата и даночните реформи.
– Да се биде директор на УЈП е предизвик за секој даночник. Со моето долгогодишно искуство во УЈП, функцијата на прв даночник и да се управува со даночната администрација е голема одговорност, особено ако се земе предвид дека станува збор за институција која истовремено треба да обезбеди праведно и ефикасно собирање на даноците, но и да го сервисира стопанството и да обезбеди висок квалитет на услуги за сите граѓани, изјави Лукаревска
Таа потенцира дека нејзиното делување и посветеност ќе биде во насока на натамошно остварување на мисијата и визијата на Управата, но и кон нов квалитет на даночните реформи засновани на зголемување на транспарентноста, активна и неселективна борба против неплаќачите на данок, поедноставување на постапките за пријавување и плаќање на даноците и унапредување на професијата даночник.