До надлежната комисија во Општина Прилеп поднесени се околу две и пол илјади барања за проценка на штетите од минатонеделното невреме. Најмногу барања се поднесени за тутунските насади, потоа за житарките, за лозјата и за овоштарниците. Според првичните согледувања, штетите кај тутунот се движат 30–60 проценти, а оштетувањата се најголеми кај житарките каде што родот е целосно уништен.
Формуларите се доставуваа до локалната самоуправа со фотокопија од имотен лист или договор за закуп и фотокопија од лична карта на барателот.
Комисијата за проценка на штети формираше пет тима составени од надворешни стручни лица, кои до 5 јули треба да ги подготват извештаите, а до 12 јули треба да биде изготвен елаборатот што ќе биде доставен до второстепената комисија во Владата на Република Македонија.
Во зависност од расположливите средства во државниот буџет, ќе се знае во колкав износ ќе бидат помогнати земјоделците од оваа општина.