Прилеп ќе гради нова населба, наречена „Градина“, која е замислена како модерна европска населба, за 13.000 жители, соопшти општината.
Населбата е на 1,5 км раздалеченост од строгиот центар на Прилеп. Инфраструктурата е предвидена по европски стандарди: широки улици, тротоари, велосипедски и пешачки патеки, енергетски ефикасно осветлување, централно греење, многу зеленило, градинка, училиште, спортски центри, трговски центри и се она што претставува модерна и урбана населба.
Населбата „Градина“ е со површина од 42 хектари, со предвидени градежни парцели за станбени куќи и станбени куќи со посебен режим, парцели за станбени згради, за деловни објекти, големи трговски и угостителски единици, за образование, објекти за спорт и рекреација, како и парцели за комунална супраструктура односно за изградба на трафостаници.
„На јавното наддавање можат да се пријават физички и правни лица. Пријавувањето е во тек и ќе трае до 23. август, а јавното наддавање ќе биде на 30. август“, информираат од општината.