Претседателот на Парламентарното Собрание на Советот на Европа Жан-Клод Мињон ќе ја посети Република Македонија во периодот од 10 до 12 јуни 2013, јавува дописникот на МИА од Стразбур.
Според соопштението од кабинетот на претседателот на ПССЕ, тој во Скопје треба да се сретне со претседателот Ѓорге Иванов, премиерот Никола Груевски, претседателот на Собранието Трајко Вељаноски, заменик претседателот на владата задолжен за европски прашања Фатмир Бесими, како и со вицепремиерот задолжен за спроведување на Охридскиот рамковен договор.
Жан-Клод Мињон на 11 јуни ќе одржи говор пред Собранието на Република Македонија, а има предвидено и разговори со координаторите на политичките групи.
Посетата на Мињон доаѓа само десетина дена пред расправата во ПССЕ за извештајот за постмониторинг дијалогот со Република Македонија.