Градоначалникот на општина Карпош Стефан Богоев информира дека денеска им врачил решение за прекин на постапката за добивање одобрение за градба на Социјалистичката партија и Гренадер Дооел Скопје за парцелата во Тафталиџе 1, пред ОУ „Јан Амос Коменски“, чиј сопственик е СП.
Решението, како што кажа на денешната средба со новинарите, е врз основа на член 95 од Законот за општата управна постапка, и се носи додека не заврши предистражната постапка која ја води надлежното обвинителство за парцелата.
Општина Карпош, појасни, добила писмо од надлежно јавно обвинителство за доставување списи за градежната парцела чиј сопственик е Социјалистичката партија на Македонија со кое била побарана целокупната документација, како и претходниот и сегашниот ДУП бидејќи парцелата е дел од предистражна постапка.
Богоев појасни дека по важечкиот ДУП, на местото на стариот Дом на култура има два објекти-лепенки, станбена зграда и хотел со дел за култура во него. Инвеститори се Социјалистичката партија и Гренадер Дооел Скопје, кои во општината имаат процедура за добивање одобрение за градба и кои пред неколку месеци уплатиле и комуналии.
На 20 февруари годинава општината до инвеститорите доставила писмо во кое побарале да им достават жиро-сметка за да се вратат уплатените средства бидејќи за таа недвижност е поведена предистражна постапка пред надлежното обвинителство. На 26 февруари инвеститорите побарале да продолжи постапката и навеле дека за нив е неприфатливо враќањето на уплатените средства.