Претседателот на Собранието Трајко Вељановски ја прекина 47. собраниска седница откако во нејзиниот попладневен дел по две паузи од по еден час што ги побараа опозициските пратеници, не беше обезбеден кворум за гласање по точките од дневниот ред.
Вељановски неколкупати упати повик до пратениците од опозициските партии за присуство на седницата за да се гласа по предлог законите и да може да се расправа и за предложените измени од Изборниот законик, поднесен од опозицијата.
Трајановски оцени дека е очигледно оти опозицијата бара паузи затоа што нејзините пратеници не сакале да се расправа за измените на Изборниот законик, што тие го предложиле. Воедно апелира до претседателите на комисиите за финансирање и буџет и за труд и социјална политика да се зафатат со своите деловнички обврски и да закажат седици на чиј дневен ред се и Предлог буџетот за 2013 година и Предлог измените на Законот за пензиско и инвалидско осигурување.
– Има друг начин за изразување револт, но не и преку буџетот и други закони поради кои би настрадале одредени категории на граѓани, како пензионерите и корисниците на социјална помош, кои се најмалку виновни, рече Вељановски.
