Предлогот за одземање на мандатот на пратеникот од ВМРО-ДПМНЕ, Никола Груевски, утре е на дневен ред на пленарна седница во Собранието.
Вчера со пет гласа „за“, односно мнозинство гласови, Комисијата за мандатно-имунитетни прашања во Собранието констатира дека ќе поднесе извештај до Собранието со заклучок за одземање на пратеничкиот мандат на експремиерот.
Според деловникот, Собранието ќе треба да го разгледа барањето на првата наредна пленарна седница. Мандатот на Груевски е последна, 20. точка, на дневниот ред на утрешната седница. Но сè поизвесно е дека предлогот нема да помине на седницата со оглед на тоа што е потребно двотретинско мнозинство, а осумтемина пратеници од ВМРО-ДПМНЕ и коалицијата претходно соопштија дека нема да гласаат „за“ одземање на неговиот мандат.