Благодарение на проектот од страна на Министерството за транспорт и врски и на ЈКП „Водовод и канализација“, вреден околу 1.100.000 евра, денеска министерот за транспорт и врски Миле Јанакиески во придружба на градоначалникот Марјан Ристески ги пуштија во функција десетте нови бунари, со издашаност од 140 литри вода во секунда.
Според Ристески, со бунарите, замената и обновата на водоводната мрежа градот полека го решава главниот проблем со водоснабдувањето во оние периоди кога е намален протокот на изворот Студенчица.
Носителот на листата за советници од ВМРО-ДПМНЕ, Никола Димески, во придружба на другите кандидати за советници од владејачката коалиција, заедно со министерот и градоначалникот, присуствуваа и на доделување на 24 имотни листа на корисници на куќи во населбата Варош. Според Комисијата за проценка на недвижен имот од Општината, вредноста на еден ваков објект изнесува некаде околу 10.000 евра.
Покрај тоа што се прави во екот на предизборната кампања, сето ова уредно е поставено и на општинската веб-страница, на која веќе еднаш осамнаа партиски симболи и беше користена за партиска промоција, како што објавивме пред една недела.
А.Ш