Утре во 11 часот ќе се одржи отворено заседание на Професорскиот и Студентскиот пленум пред Собранието на Република Македонија.
На заедничкото заседание ќе се дискутираат прашањата за организирање на претстојните масовни демонстрации на незадоволство и револт, како и начинот на организиран отпор кон предложените штетни измени во образованието.
На овој настан на народните избраници ќе им се достават писмата на професорите од Македонија, писмото на странските професори и писмото на студентите со кои се искажуваат аргументите за нивното неприфаќање на предложените измени и дополнувања на Законот за високото образование.
Отворањето на постапката на пленарна седница на Собранието на Република Македонија во спротивност со јавно искажаниот став на најзасегнатите од овие промени, за нив е неприфатлив и недемократски чин и затоа најавуваат уште поголема мобилизација и масовно противење на ваквиот начин на носење на одлуките.