Комисијата за прашањата на изборите и именувањата во Собранието го предлага адвокатот Стевица Јосифовски да биде еден од двајцата нови членови на Агенцијата за електронски комуникации. Покрај него, меѓу 12 кандидати кои се пријавиле на јавниот оглас, втор предложен член на АЕК е дипломираниот електроинженер, Ервин Реџепагиќ.
Јосифовски бил на позицијата директор на секторот за правни прашања на „Македонски телеком’, претседател на Здружението на правници на Македонија, стручен соработник во Основното јавно обвинителство во Гостивар. Од 2014 година кариерата ја продолжил како адвокат во адвокатската канцеларија „Милановиќ-Јосифовски“. Јосифовски бил и поранешен член на Комисијата за заштита на конкуренцијата.
Новопредложениот член на АЕК е од правниот комитет на СДСМ и беше овластено лице на Коалицијата предводена од Социјалдемократскиот сојуз на Македонија при поднесувањето на приговорите до Државната изборна комисија.
Јосифовски за „Макфакс“ изјави дека мотивот поради кој се пријавил на огласот бил фактот што еден дел од неговата досегашна кариера е тесно поврзан со електронските комуникации: „Ме мотивиршае тоа што како профеисоналец и човек со животно и професионално искуство во оваа сфера можам да придонесам за развојот на електронските комуникации, пред сè од аспект на интересот на корисниците, подобрување на услугите, цените…“, рече Јосифовски.
Предлогот за овие двајца кандидати ќе се најде пред пратениците на седницата в понеделник 28 јануари.
Васко Маглешов