Народните избраници сакаат да си ја обезбедат иднината и по пратеничкиот мандат. Откако ќе ги напуштат пратеничките фотелји сакаат да ги чека работа во јавната администрација и тоа на соодветно место.
Иако никој не сака да говори отворено, сепак „А1он“ дознава дека формираната работна група за реформи веќе работи на изготвување на вакво законско решение.Идејата дошла од Независната пратеничка група на ВМРО-ДПМНЕ и коалицијата.
Не е случајно што ваква идеја доаѓа сега пред гласањето на уставните измени и гласањето на реформските закони за кои треба 80 пратенички гласа.
Сличен закон беше предложен од Јанаќе Витановски во 2005 година, кој тогаш беше пратеник, а сега е член на ДИК. За големите привилегии кои тогаш беа изгласани, јавноста реагираше остро и законот никогаш не заживеа.Бидејќи со законот се предвидуваше тогашните и претходните пратеници да можат да одат во пензија со 25 години стаж, да имаат право на бесплатен превоз и по пратеничкиот мандат, да имаат загарантирано вработување во администрацијата, што значи нееднаквост пред Уставот, Уставниот суд го укина законот.