Собранието на Република Македонија исплатило 7,4 милиони евра за патни трошоци за користење на сопствено возило, за службени потреби на пратениците во изминативе 10 години. До овие податоци дошол Центарот за истражувачко новинарство СКУП- Македонија.
Драги Цуклев, пратеникот на ВМРО-ДПМНЕ од Гевгелија втора година по ред е рекордер по наплатени пари за користење на сопствено возило за службени потреби. Годинава на негова сметка се уплатени 1, 1 милион денари или околу 18.500 евра, во споредба со лани, кога наплатил околу 25.000 евра.
Пратеникот од изборната единица Азија и Австралија, Васко Наумовски, е скоро непознат за домашната јавност, тој ретко се појавува на собраниската говорница, за реплика или пак за да постави пратеничко прашање. Но, Наумовски успеал да наплати неверојатни 971.474 денари, или 15.800 евра, од Собраниската благајна од октомври 2014 до октомври 2015 година за користење на сопствено возило за службени потреби во Македонија.
Листата од пратеници кои наплатиле најмногу патни трошоци за користење на сопствено возило за службени потреби, покрај Цуклев ја предводат Крсто Мукоски, Ромео Тренов, Сашо Василевски, Силвана Бонева, Момчило Аврамовски, Љуљана Златуроска и Рамиз Мерко.
Собранието на Република Македонија исплатило 7,4 милиони евра за патни трошоци за користење на сопствено возило за службени потреби на пратениците во изминативе 10 години. Со овие пари можеше да се изградат 5 нови училишта со капацитет од 2.600 деца или 30 градинки со капацитет да згрижат околу 3 000 деца.