Со „62 гласа“, без ниту еден „против“ и „воздржан“, пратениците во Собранието го изгласаа Законот за попис, со кој се предвидува дека оваа статистистичка операција ќе се спроведе во месец април годинава.
Покрај владејачкото мнозинство, поддршка за Законот дадоа и од албанскиот опозициски блок од Коалицијата Алијанса за Албанците и Алтернатива, а ВМРО-ДПМНЕ како што најави е против законот, за кој кажа дека ќе бара негово поништување преку собирање граѓански потписи.
Дебатата за предлог-законот помина со бројни несогласувања меѓу парламентарното мнозинство и опозицијата.
ВМРО-ДПМНЕ сметаат дека сега не е вистинско време за попис поради пандемијата со коронавирусот, а при тоа поднесоа и 20-тина амандмани кои не беа прифатени.
Еден меѓу предложените беше при спроведувањето на пописот да се употреби и опрема за скенирање отпечатоци од прстот.