Пратениците се поделија по одредбите на Законот за заштита и благосостојба на животните, предложен од 9 пратенички од различни пратенички групи.
Маја Морачанин рече дека целта е да се спречи неконтролираното и неограничено зголемување на бројот на улични кучиња, кои во најголем дел потекнуваат од размножување на домашните миленици.
Имајќи го предвид тоа дека секое куче женка во репродуктивниот период продуцира десетина младенчиња годишно и тоа дека најголем број од нив завршуваат на улица како улични кучиња неопходно е, рече, да се најде законско решение за надминување на проблемот.
Сопствениците на кучиња се должни да ги пријават своите кучиња еднаш годишно во ветеринарните амбуланти, клиники и со цел да ги регистрираат и идентификуваат.
Сопствениците на кучиња во репродуктивен период се должни да ги кастрираат, односно ојаловат своите кучиња во установите,освен оние сопственици што имаат регистрирано одгледувачници на кучиња.Трошоците за овие постапки се на товар на сопствениците на кучињата.
Наместо 100 евра како досега, казната за непочитување на законот е 700 евра.
Вакво законски решение е поддржано од невладини организации меѓу кои и Анима Мунди, рече Љиљана Поповска.
Илија Димовски рече дека дијагнозата е точна, но не и терапијата.
На ваков закон остро се спротивстави Ферид Мухиќ. За него законот е најбрутален досега, садистички предлог, предлог за тортура врз кучињата. Апелираше пратениците најостро да се спротивстават на вакво решение.
Мнозинството не го прифати ова законско решение.