Пратеници и претставници на невладиниот сектор од европските држави и од земјите-аспиранти ќе дебатираат заедно на конференцијата „Поврзувањето на младите-движење напред”, што денеска и утре се одржува во Трст, во рамките на програмата на Европскиот парламент за млади политички лидери, непосредно пред одржувањето на Самитот за Западен Балкан.
На конференцијата, како што информираат од Собранието на РМ, учествува само по еден пратеник од парламентите на земјите на регионот на Западен Балкан. Од Македонија учествува пратеничката Ивана Туфегџиќ.
На Конференцијата претставниците на невладиниот сектор од европските држави и од земјите-аспиранти, ќе дебатираат заедно и со директорката за Западен Балкан во Европската комисија Геновева Руиз Калавера и со европратеникот и член на Еразмус+Алумни Фабио Масимо Касталдо, а се очекува на затворањето да се обрати еврокомесарот за добрососедска политика и проширување Јоханес Хан.
Конференција, како што информираат, има за цел да ги обедини искуствата, мислењата и конструктивните приоди кон прашањето на поврзување на младите, кое е тесно поврзано со демократските процеси, степенот на развиеност на политичката култура и со изборното законодавство на земјите од овој регион.