„Извршниот одбор на Партијата на пензионери (ПП), на седницата одржана на 10.11.2018 година, ја потврди определбата на партијата за одлучно настапување со цел забрзување на процесите кои ја обезбедуваат евро-атланската интеграција на Македонија.
За Партијата на пензионери не постои друга алтернатива, ниту опција, со која може да се надмине најзначајната пречка на стратешката определба на земјата за зачленување во НАТО и ЕУ и истовремено да се зацврсти националниот идентитет, да се потврди македонскиот јазик, пред се од и кај соседите, долгорочно да се осигура просперитет, стабилност и услови за квалитетни реформи во земјата, освен брзо прифаќање и применување на стандардите, критериумите и принципите на владеење кои се практикуваат во земјите членки на НАТО и ЕУ.
Поради тоа, Извршниот одбор на ПП дава недвосмислена поддршка за успешно завршување на отпочнатиот процес, во Собранието на Република Македонија, за донесување на уставните амандмани и измени на Уставот во склад со Преспанската спогодба“, се вели во соопштението на Партијата на пензионери.