Центарот за јавно здравје повторно изврши испитувања на чешмите во кумановско Проевце и анализите покажаа дека бактеријата псеудомона аеругеноза е присутна кај една од чешмите од каде истекува минерална вода.
Надлежните институции ги дезинфецираа чешмите во неколку наврати. Во текот на месецот беа поставувани и натписи дека водата бактериолошки е неисправна за пиење, но несовесни граѓани постојано ги отстрануваа. Кумановци секојдневно полнат вода од овие чешми и покрај предупредувањата на лекарите.
– И последните испитувања покажаа присуство на бактеријата во една од шестте чешми. Информациите се доставени до надлежните институции. Граѓаните може да ја користат водата од сите чешми, освен од третата, вели специјалистот по општа хигиена Мимоза Величковска од Центарот за јавно здравје.
Бактеријата се размножува во чемиште бидејќи средината е топла и влажна, се создаваат лежишта, а во одредени делови нема проток на вода по што се создаваат наслаги од калциум, објаснуваат од Центарот.
Бактеријата е потенцијално опасна за лицата со ослабен имунитет и за децата и може да предизвика проблеми на уринарниот систем.