Советот за јавни обвинители повторно ја одложи седницата на која требаше да се одлучи дали предметот „Сопот“ ќе му биде предаден на СЈО како и за повлекување на обвинението за преметот „Пуч“. Претседателот на Советот на јавни обвинители, Петар Аневски не даде објаснување зошто повторно е одложена седницата.
Тој соопшти дека Советот вчера ја разгледувал претставката на в.д. претседателката на Кривичниот суд и по извршениот увид на видео материјалот од рочиштето бил донесен заклучок дека Катица Јанева и Фатиме Фетаи во рочиштето за општина Центар го прекршиле етичкиот кодекс на јавните обвинители во Република Македонија.
– Дадовме препорака до јавниот обвинител со заклучок дека ќе треба да ја разгледа можноста од определување на друг јавен обвинител за застапување на тој предмет. Прекршени се основните начела на етичкиот кодекс и посебно членот 14 каде се регулирани односите помеѓу судот и јавното обвинителство каде се пропишува дека тие треба да бидат коректни и да се внимава на однесувањето на јавниот обвинител при застапување на предметите, изјави Аневски.
На последното рочиште за предметот „Насилство“ Катица Јанева и Фатиме Фетаи влегоа во директна расправа со судијката Михајлова при што добија казна од по 2000 евра.
Виктор Јованов