Група активисти, граѓански организации и граѓани, поттикнати од настаните и нередите што се случија во Скопје на 1 и 2 март, како и најавите за нови протести за утре и за задутре, денеска во Старата скопска чаршија повикаа на смирување на страстите и воздржување од натамошни инциденти и немири.
Повикот е упатен од Старата скопска чаршија, како симбол кој спојува и ги вкрстува патиштата на граѓаните.
Преку повикот се бара институциите на државата што поскоро да ги расветлат причините за избувнувањето на инцидентите за време на меѓуетничките протести во Скопје на 1 и 2 март, а предизвикувачите на насилството да бидат санкционирани и соодветно казнети. Истовремено, се упатува апел до сите сограѓани да не наседнуваат на провокации и манипулации.
– Ние нашата мултиетничност ја изразуваме секојдневно преку начинот на кој живееме. Правото на протест е уставно право на сите, но повикуваме тоа право да се користи достоинствено и без предизвикување инциденти и немири. Повикуваме на смирување на страстите и воздржување од понатамошни инциденти и немири. Ги повикуваме и апелираме сите надлежни институции што побрзо да ги расветлат инцидентите, а во иднина да работат што поревносно и професионално како би спречиле ширење на насилствата и немирите или избивање на нови, се вели во повикот.
Граѓанските организации, активисти и граѓани апелираат до родителите и старателите, да ги заштитат децата од секаков тип ширење етничка, верска, национална, расна и други типови омраза. Децата да не учествуваат во протести без придружба на родители/стратели и да не се злоупотребуваат во политички и партиски цели.