Управата за јавни приходи (УЈП) во Кочани очекува 15.000 граѓани да поднесат годишна даночна пријава за остварени приходи во 2016 година.
Како што изјави координаторот на Даночното одделение при УЈП – Кочани Билјана Спасовска, до денеска, во УЈП – Кочани документи поднеле само 3.281 лице.
– Очекуваме граѓаните да си ја исполнат својата граѓанска должност и да поднесат пријава за остварен приход по повеќе основи. Дополнителни приходи за кои треба да се поднесе годишна даночна пријава се приходи од награди, бонуси остварени од работен однос, приходи од кирии, закупнини на деловен и станбен простор, авторски права, права од индустриска сопственост, дивидентни, учество во добивката и камати од заеми дадени на физички и правни лица, капитални добивки, добивки од лотариски игри и игри на среќа повисоки од 5.000 денари, како и добивки од игри на среќа од интернет и специјализирани сајтови, рече Спасовска.
Обврзници за поднесување годишна даночна пријава се и лицата со лични примања остварени од странство за активности што граѓаните ги вршат во Македонија, работи во врска со ангажирање во амбасади, мисии на меѓународни организации и други дополнителни приходи што се надвор од основните приходи плати и пензии.
– Граѓаните имаат обврска да ги пријават и приходите што ги добиваат по основ на премии за осигурување кредити од банките и за сите други установи што ги покриваат нивните трошоци. Обврска за неподнесување годишна даночна пријава имаат само граѓаните кои имаат остварено приходи од плата и пензија. Работодавачите имаа обврска до 25 јануари да им дадат на вработените потврда за остварените приходи од работен однос, од регрес, бонуси и награди, објасни Спасовска.
Обврската за поднесување годишна даночна пријава граѓаните треба да ја исполнат до 15 март.
УЈП – Кочани апелира граѓаните да не го чекаат последниот рок.