Опозицијата во Македонија мора да го прифати фактот дека власта ја има поддршката на мнозинството од народот, да се врати во Собранието и да сфати дека бојкотот не е одговор.
Ова го порача германскиот европратеник Бернд Поселт на денешното прво претставување на драфт-верзијата на Резолуцијата на Европскиот парламент за Република Македонија во рамки на Комисијата за надворешни работи (АФЕТ), јавува дописникот на МИА од Брисел.
Поселт, кој и припаѓа на групата пријатели на Македонија од Европарламентот, додаде дека оној што го има мнозинството народ зад себе, исто така мора да разбере оти и малцинството има свои права. Според Поселт, треба и да се престане со плашењето дека Македонија има територијални претензии кон соседите, оти во досгеашната историја нашата земја, според германскио пратеник, го сменила Уставот, знамето и прифатила референца за името само за да се реши проблемот за името, кој за жал се уште постои.
– Токму затоа се согласувам со предлогот на еврокомесарот за проширување Штефан Филе да почнат преговорите за членство на Македонија во ЕУ, а во меѓувреме да се решава спорот за името, оти од почетокот на преговорите до добивањето на полноправно членство во ЕУ требаат осум до десет години, што е доволно време. Но, идејата за блокирање на стартот на пристапните преговори е неприфатлива!, отсече европратеникот од редовите на Европските народни партии