СВР Охрид и ОВР Струга преземаат соодветни безбедносни мерки и посебен сообраќаен режим во пресрет на одржувањето на годинашниот Преспа Форум за дијалог 2023 (ПФД-2023) што утре и в петок ќе се одржи во Струга.
Активностите, како што информира портпаролот на СВР Охрид Стефан Димоски, се насочени кон физичко и сообраќајно обезбедување на одредени објекти, локации и сообраќајници, каде е предвиден престој и движење на најавените делегации.
– Со оглед на исклучително значајниот настан, кој ќе се одвива во Струга, апелираме до граѓаните да ги почитуваат наредбите што ги издаваат полициските службеници по сообраќајниците и другите локации, изјави Димоски за МИА.
Според него, денеска од 16 часот на сила ќе биде забраната за паркирање и сообраќај на моторни и други возила на улицата „Партизанска“ од кружната крстосница со „Маркс и Енгелс“ до „Владо Малески“ и улицата „15 корпус“.
– Под посебен сообраќаен режим и сообраќајно обезбедување утре ќе бидат и останатите локални и регионални патишта со посебен акцент на улицата „Партизанска“ како и на дел од магистралниот пат Струга-Ќафасан, каде ќе има повремен прекин на редовниот сообраќај заради приоритет на движење на возилата под придружба, додаде Димоски.