Директорот на агенцијата за спорт и млади на Република Македонија Лазар Поповски при престојот во Кочани го посети градскиот отворен базен каде ја истакна заложбата на Владата, Агенцијата и општина Кочани за негово покривање.
– Базенот во Кочани ќе добие ново руво. Ќе биде покриен и ќе се користи во текот на целата година. Ќе формираме ватерполо екипа, а ќе се заложиме и за развој на останатите спортски активности. Вкупната вредност за покривање на базенот ќе изнесува од 2 до 4 милиони евра кои ќе ги обезбедат Владата, Агенцијата и Општината и по пат на приватно јавно партнерство, истакна Поповски.
Тој ја најави и инвестицијата на Владата за развој на зимскиот туристички центар Пониква на Осоговските Планини со вложувања на средства во изградбата на сноу борд патека, како и изградба на 100 повеќенаменски игралишта во државата за кои Владата обезбеди 600 милиони денари.
Првите десет игралишта, нагласи, ќе започнат да се градат во Источна Македонија, а во Кочани и Пробиштип работите ќе започнат од утре.