Традиционално пријателски и блиски односи меѓу Македонија и Полска констатираа денеска претседателите на двете држави Ѓорѓе Иванов и Бронислав Коморовски на средба на маргините на Самитот на шефови на држави и влади на Централна Европа во Братислава, на која Иванов побарал поддршка од Полска за евроинтегративните процеси на земјата.
– Македонија бара и очекува Европскиот совет во јуни да ни одреди датум за почеток на преговорите. Македонија е земја кандидат од 2005, има четири последователни препораки за датум и очекува европските лидери да го применат истиот принцип на паралелено движење во интеграцијата и надминувањето на билатералните разлики, принцип кој даде позитивни резултати токму во нашиот регион, истакна Иванов на средбата.
Полскиот претседател, кој истакна дека Послка останува силен поддржувач на проширувањето и политиката на отворени врати, беше запознат со актуелностите поврзани со прашањето за името, односите со соседите и состојбите во регионот.
На средбата Иванов го запозна својот полски колега со пречките со кои Македонија се соочува во напорите за интеграција во ЕУ и НАТО.
Заеднички заклучок беше дека интеграцијата во евроатланските структури придонесува за подобро разбирање меѓу државите, поголема соработка, надминување на разликите на европски начин, констатирајќи дека успехот и скорешниот прием на Хрватска треба да биде индикација за земјите од регионот, но и за ЕУ.
На средебата Коморовски ја прифати поканата на Иванов за возвратна официјална посета на Македонија која ќе се реализира во септември и која се очекува да даде нов позитивен импулс за натамошно јакнење на односите и продлабочување на соработката во сите сфери од заемен интерес.
Претседателот Иванов, попладневно се сретна и со молдавскиот колега Николај Тимовти на која беше констатирано дека односите меѓу двете земји се пријателски, но дека соработката во сите сфери од заемен интерес треба да добие на содржина и позитивна динамика.
За таа цел, по извесна пауза е договорено во наредниот период да се разменат посети на највисоко ниво, да се унапреди правната рамка и да се создадат услови за поинтензивна соработка особено во економската сфера.
Претседателот Иванов на средбата беше информиран за актуелните политички и економски состојби и предизвици во Молдавија.
Македонскиот претседател денеска се сретна и со црногорскиот колега Филип Вујановиќ, а утре ќе се сретне со украинскиот претседател Виктор Јанукович.