Четворица државјани на Полска се лишени од слобода откако, заедно со уште три лица, со четирицикли оштетиле влезна врата и влегле во воен објект во Тетово.
Како што соопшти МВР, на 28 септември во 18:24 часот, Воената полиција на АРМ пријавила дека во местото „Еребино“, каде што се наоѓаат воени магацини, повеќе лица со четирицикли ја оштетиле влезната врата на објектот.
Војниците кои биле на стража на местото задржале четири лица: Х.М.А. (55), Д.К.В. (55), К.В. (41) и К.Ј.Р. (36), сите државјани на Полска. Други три лица со четирицикли успеале да побегнат.
Четворицата се лишени од слобода поради постоење сомнение за сторено кривично дело „неовластено влегување во воени објекти“ од член 350 од Кривичниот законик.
Полицијата презема мерки за пронаоѓање на останатите три лица, а по целосното документирање на случајот ќе следуваат соодветни поднесоци.