Во пресрет на шпицот на летната туристичка сезона, на иницијатива на Секторот за внатрешни работи – Охрид вчера се одржа средба на раководните лица од полицијата со охридските угостителски работници, со цел поблиска и постојана комуникација, размена на информации и координирани активности во насока на превенирање и елиминирање на можните нарушувања на јавниот ред и мир како и други облици на насилно, криминогено и деструктивно однесување.
На угостителските работници притоа им беше посочено дека во летниот период СВР – Охрид ќе презема деноноќни засилени и континуирани законски превентивни и репресивни мерки во областа на јавниот ред и мир, криминалитетот, сообраќајот и во другите области на безбедносен план.
Според полициското соопштение, активностите ќе бидат самостојни, но и во координација со надлежните инспекциски служби и ќе значат контрола на угостителските објекти во однос на почитување на работното време, присуство на малолетни лица по 24 часот, точење алкохол, оддавање на пијанство, непристојно, насилно и дрско однесување, гласна музика и други облици на вознемирување на граѓаните.
Полицијата ги прифати забелешките на угостителите да презема мерки и надвор од угостителските објекти кога станува збор за лицата што се јавуваат како нарушители на јавниот ред и мир, како и на лицата кои вршат различни казнени дела, како и посебно да се ангажира кон сите пријави за гласна музика, водење кучиња без заштитни маски, непрописно паркирани возила во централното градско подрачје и пред угостителските објекти. Полицијата најави дека ќе одговори на сите други барања на граѓаните, што се однесуваат на нивните безбедносни потреби.
