Голема полициска акција за приведување на лицата кои денеска учествуваа во насилните протести пред владата против изборот на Талат Џафери за министер за одбрана, во моментов се случува во скопската населба Аеродром – објави МКД.МК.
Групата попладнево беше разбиена, по што најголемиот дел од учесниците, претежно млади луѓе, се упатиле кон скопската населба Аеродром. На тоа му претходеле обиди за инциденти и нереди на Камениот Мост, каде лицата успеале да истепаат неколку случајни минувачи од албанска националност. Од полицијата за порталот ги потврдуваат информациите.
На денешните протести пред владата се собра поголема група млади лица. Тие почнаа да се однесуваат насилно и да фрлаат камења кон зградата на владата и кон полицајците. Неколку полицајци се пожалија дека биле погодени со камења. Групата била потисната и почнала да се повлекува, но при тоа продолжила со насилно однесување. Оштетени се неколку полициски возила, но и приватни возила. Групата фрлала камења и кон автобуси на ЈСП. Досега се приведени неколкумина, но тече акција за пронаоѓање и на останатите учесници во протестите што биле регистрирани од полицијата дека се однесуваат насилно, изјави Иво Котевски, заменик – министер задолжен за односи со јавност.