36-годишен жител на Кавадарци со возило влегол во дворот кај својот 35-годишен пријател. Полиција која се затекнала во близина забележала како двајцата разменуваат нешто, и бидејќи им биле сомнителни ги пречекале откако излегле од дворот и ги застанале.
Го претресле возилото при што внатре нашле дрога – хероин. Веднаш ги задржале и се обратиле до судот за наредба за претрес во куќата.
Наредбата ја добиле, а во објектот пронашле и друг вид дрога. Амфетамин, хероин, марихуана, дигитална вага и пари во различни апоени.
Во официјалната информација од МВР се вели:
„ На 18.05.2023, полициски службеници од ОВР Кавадарци ги лишиле од слобода М.М.(35) и Г.Н.(36), двајцата од Кавадарци. Околу 19.10 часот бил забележан Г.Н. како со патничко возило „форд“ влегува во дворот на М.М. и како разменуваат нешто, а откако излегол од дворот, на улица „7 Септември“ бил извршен преглед во возилото и бил пронајден хероин.
Подоцна, со судска наредба, бил извршен претрес во домот на М.М., при што биле пронајдени и одземени амфетамин, хероин, марихуана, дигитална вага и пари во различни апоени.“
Двајцата биле приведени во Полициската станица Кавадарци и по целосно документирање на случајот, против нив ќе биде поднесена соодветна пријава.