Во собраниската Комисија за европски прашања во прво читање помина Предлог законот за неевидентирани лица во матична книга на родени.
Како што образложи раководителката на сектор во Министерството за труд и социјална политика, Мабера Камбери, станува збор за закон со кој се решава проблемот на лицата кои се неевидентирани во матична книга на родени т.н. фантоми, а кои се најдени врз основа на јавен повик. При тоа во посебен електронски регистар се евидентирани 700 лица.
– Законот се однесува само на овие 700 лица и со него им се даваат четири права: правото на образование, на вработување и на социјална и на здравствена заштита. Новиот закон е во согласност со препораките на Европската комисија за решавање на овој проблем и Поглавјето 23 во делот на фундаменталните права. Имплементацијата на законот ќе се следи со АКИ-то на ЕУ, рече Камбери.
Членовите на Комисијата на денешната седница во прво читање го усвоија и Предлог законот за меѓународно приватно право.
Заменик министерот за правда Оливер Ристовски истакна дека потребата за донесување на овој нов закон е процесот на усогласување на националното со законодавството на ЕУ, особено во делот на правосудната соработка за граѓанско-правната материја која е дел од Поглавјето 23 од пристапните преговори.
– Станува збор за седум регулативи на Европскиот парламент и на Советот на Европа од наведената сфера, рече Рисовски.